Hveravellir á Kili

Hveravellir voru friðlýstir sem náttúruvætti 1960 og var friðlýsingin endurskoðuð árið 1975. Svæðið var friðlýst m.a. vegna þess hve einstakt hverasvæðið þótti vera og álitu margir að á Hveravöllum væri að finna fegurstu vatnshveri Íslands. Þykja hverirnir einstaklega tærir og sérlega fagurlituð mynstur má finna í útfellingum. Stærð náttúruvættisins er 5,3 ferkílómetrar.