Umhverfistofnun - Logo

Kirkjugólf

Undanfarið hefur samstarfshópur unnið að gerð stjórnunar- og verndaráætlunar fyrir náttúruvættið Kirkjugólf. Tillaga að áætluninni hefur nú verið lögð fram til kynningar á heimasíðu Umhverfisstofnunar, sjá hér:

Stjórnunar- og verndaráætlun, tillaga
Aðgerðaáætlun til þriggja ára

Kirkjugólf er lág jökul- og brimsorfin stuðlabergsklöpp þar sem endar lóðréttra stuðlabergssúlna ná upp úr jörðu. Kirkjugólf er staðsett í túni í austurjaðri þorpsins Kirkjubæjarklausturs. Kirkjugólf var friðlýst sem náttúruvætti árið 1987.  Það hefur jarðfræði- og sögulegt verndargildi sem og fræðslugildi.

Stjórnunar- og verndaráætlun fyrir Kirkjugólfið er ætlað að vera stefnumótandi skjal, unnið í samvinnu við fulltrúa landeigenda, sveitarfélag og hagsmunaaðila og er hugsað sem stjórntæki til að móta framtíðarsýn svæðisins. Markmiðið með gerð hennar er að leggja fram stefnu um verndun náttúruvættisins og hvernig viðhalda skuli verndargildi svæðisins þannig að sem mest sátt ríki um. Í áætluninni er lögð fram stefnumótum til 10 ára, ásamt hlaupandi aðgerðaáætlun til þriggja ára. 

Eins og áður segir liggja drög að áætluninni nú frammi til kynningar og er öllum frjálst að koma á framfæri athugasemdum og ábendingum vegna hennar. Frestur til að skila inn ábendingum og athugasemdum varðandi tillöguna er til og með 15. desember 2021. 

Hægt er að skila inn ábendingum og athugasemdum hér að neðan eða senda póst til Umhverfisstofnunar, Suðurlandsbraut 24, 108 Reykjavík. 

Nánari upplýsingar veita Guðbjörg Gunnarsdóttir, gudbjorg@umhverfisstofnun.is, og Magnús Freyr Sigurkarlsson, magnus.freyr.sigurkarlsson@umhverfisstofnun.is,  eða í síma 591-2000.