Umhverfistofnun - Logo

Þjóðgarðurinn Snæfellsjökull

 

Mynd: Kristinn Jónasson
Mynd: Kristinn Jónasson

Undanfarið hefur samstarfshópur unnið að endurskoðun á stjórnunar- og verndaráætlun fyrir Þjóðgarðinn Snæfellsjökul. Tillaga að áætluninni hefur nú verið lögð fram til kynningar á heimasíðu Umhverfisstofnunar:

Stjórnunar- og verndaráætlun, tillaga
Aðgerðaáætlun til þriggja ára

Þjóðgarðurinn Snæfellsjökull var friðlýstur árið 2001 skv. reglugerð nr. 568/2001. Friðlýsingin var endurskoðuð og þjóðgarðurinn stækkaður 20 árum síðar sbr. auglýsingu nr. 935/2021.  Þjóðgarðurinn er um 180 km2 að stærð. Markmiðið með friðlýsingunni er að vernda fagra og fjölbreytilega náttúru svæðisins og merkar sögulegar minjar. Jafnframt er markmiðið að auðvelda fólki að ferðast um svæðið og kynnast því.

Stjórnunar- og verndaráætlun fyrir Þjóðgarðinn Snæfellsjökul er ætlað að vera stefnumótandi skjal, unnið í samvinnu við hagsmunaaðila og sveitarfélag og er hugsað sem stjórntæki til að móta framtíðarsýn svæðisins. Markmiðið með gerð hennar er að leggja fram stefnu um verndun Þjóðgarðsins Snæfellsjökuls og hvernig viðhalda skuli verndargildi svæðisins þannig að sem mest sátt ríki um. Í áætluninni er lögð fram stefnumótum til 10 ára, ásamt aðgerðaáætlun.

Eins og áður segir liggja drög að áætluninni nú frammi til kynningar og er öllum frjálst að koma á framfæri athugasemdum og ábendingum vegna hennar. Frestur til að skila inn ábendingum og athugasemdum varðandi tillöguna er til og með 1. september 2022. Hægt er að skila inn ábendingum og athugasemdum á heimasíðu Umhverfisstofnunar, með því að senda tölvupóst til stofnunarinnar ust@ust.is eða senda póst til Umhverfisstofnunar, Suðurlandsbraut 24, 108 Reykjavík.

Hér má lesa nánar um vinnsluferil stjórnunar- og verndaráætlunar.

Nánari upplýsingar veita Guðbjörg Gunnarsdóttir gudbjorg@umhverfisstofnun.is, Jón Björnsson jonb@umhverfisstofnun.is og Hákon Ásgeirsson hakon.asgeirsson@umhverfisstofnun.is eða í síma 591-2000.