Ársfundur Umhverfistofnunar var haldin á Hótel Nordica föstudaginn 27. mars og sóttu hann vel á annað hundrað manns.

Setningarávarp flutti Jónína Bjartmarz umhverfisráðherra og kom fram í máli hennar að umhverfismál væru orðin eitt mikilvægasta málefni samfélagsins og yrði sífellt mikilvægara í allri umræðu um framtíð lands og þjóðar. Jónína notaði tækifærið og þakkaði fráfarandi forstjóra Umhverfisstofnunar Davíð Egilsyni gott samstarf og vel unnin störf á liðnum árum og óskaði honum og fjölskyldu hans velfarnaðar í framtíðinni. Hún bauð einnig nýjan forstjóra, Ellýju Katrínu Guðmundsdóttur, velkomna til starfa og kvaðst vænta góðs af samstarfi við hana í framtíðinni.

Davíð Egilson forstjóri flutti síðan skýrslu forstjóra og kom víða við í erindi sínu. Hann rakti vanda stofnunarinnar frá sínum sjónarhóli og kvaðst hafa orðið fyrir miklum vonbrigðum með stjórnsýsluúttekt sem gerð var á vegum Ríkisendurskoðunar á rekstri Umhverfisstofnunar á sl. ári. Sagði Davíð að meginvandi stofnunarinnar fælist í gríðarlegri aukningu verkefna á sviði umsjónar og framkvæmda með samningum Íslands og EES en litlir fjármunir hefðu komið til að mæta þessu. Davíð þakkaði síðan starfsfólki UST samstarfið á liðnum árum og kvað mörg tækifæri til sóknar á vettvangi stofnunarinnar og óskaði nýjum forstjóra velfarnaðar í starfi.

• Skýrsla forstjóra

Fundarstjóri var Árni Bragason forstöðumaður Náttúruverndarsviðs Umhverfistofnunar.

Önnur erindi sem flutt voru á fundinum voru sem hér segir

• Frístundabyggðir - skipulag, þróun og álagsþættir / Ólafur A. Jónsson sérfræðingur
• Líffræðileg fjölbreytni – markmið 2010 / Trausti Baldursson fagstjóri
• Bráðaatburðir – Wilson Muuga / Kristján Geirsson fagstjóri / Gottskálk Friðgeirsson fagstjóri
• Villandi merkingar á matvælum / Jónína Þ. Stefánsdóttir sérfræðingur
• Hávaði, loftmengun og skipulag / Þór Tómasson fagstjóri
• Umhverfisáhrif jarðhitanýtingar / Sigurrós Friðriksdóttir fagstjóri