Loftgæði á Íslandi eru almennt talin góð en við ákveðnar veðurfarslegar aðstæður geta loftmengunarefni safnast upp og farið yfir heilsuverndarmörk. Loftmengun á sér mismunandi uppsprettur, ýmist frá iðnaði, bílaumferð og/eða jarðvegsfoki. Sú mengun sem kemur einna mest frá umferð er brennisteinsdíoxíð (SO₂ og SO_x), kolmónoxíð (CO), koldíoxíð (CO₂) og köfnunarefnisoxíð (NO, NO₂ og NO_x). Ósón (O₃) myndast þegar köfnunarefnisoxíð efni hvarfast með hjálp annara efna og sólargeisla og er því óbeint flokkuð sem umferðarmengun. Svifryk (PM₁₀ eða PM_2,5) er einnig talin sem umferðarmengun en svifryk getur verið í útblæstri bíla vegna ófullkomins bruna og verið malbiksagnir vegna slits á umferðargötum. Einnig getur svifryksmengunar orðið vart þegar vindar blása jarðvegsefnum ýmist frá nærliggjandi umhverfi (malarplön, byggingarsvæði o.s.frv.) eða umhverfi lengra að og t.d. hefur svifryksmengun hækkað einhverja daga á höfuðborgarsvæðinu vegna öskufoks frá svæði í kringum Eyjafjallajökul eftir gosið.

Loftmengun helst mikið í hendur við þróun bílaumferðar og síðustu áratugi hefur loftmengun aukist vegna aukinnar bílaumferðar. Þar sem umferð er mikil, t.d. í Reykjavík á umferðaræðum og verslunargötum, getur styrkur loftmengunar mælst nokkuð hár. Meðalstyrkur köfnunarefnisdíoxíðs í Reykjavík er sjaldan meiri en 20 µg/m³ á sólarhring en hann getur átt það til að fara yfir viðmiðunarmörkin sem eru 75 µg/m³. Á dögum sem svifryk hefur farið yfir viðmiðunarmörkin (50 µg/m³) er þá aðallega að ræða malbik frá vegum en upp á síðkastið hefur það einnig verið vegna öskufoks frá suðurlandi. Á Akureyri er oft styrkur svifryks hærri en í Reykjavík og er talið að það sé einna helst vegna söndunnar gatna yfir vetrartímann og vegna jarðvegsfoks frá hálendinu í kringum Akureyri.

Tilskipanir Framkvæmdastjórnar Evrópusambandsins um loftgæði (Tilskipun 2008/50/EB) og þungmálma í lofti (Tilskipun 2004/107/EB) eru í endurskoðun og leitar framkvæmdastjórnin nú eftir áliti almennings á núverandi tilskipunum og á því hvernig best bæri að draga úr loftmengun og bæta loftgæði. Sjónarmið almennings gæti haft áhrif á tilskipanir Evrópusambandsins og þar með löggjöf hér á landi vegna EES samningsins.

Hægt er að koma með ábendingar og tillögur af því sem betur mætti fara í þessum tilskipunum með því að svara könnun Evrópusambandsins og smella hér. Frestur til að skila inn ábendingum er til 30. september 2011.