Veiðikort gefur almenn réttindi til þess að stunda skotveiðar á Íslandi samkvæmt íslenskum lögum.
Allir sem hyggjast stunda almennar fugla-, refa- eða hreindýraveiðar verða að vera handhafar veiðikorts og ætið bera kortið á sér á veiðum. Skylt er jafnframt að hafa meðferðis skotvopnaskírteini sé um skotveiði að ræða.
Ekki þarf að skila neinum gögnum til lögreglu ef einungis er farið á veiðikortanámskeið.
Umhverfisstofnun heldur veiðikortanámskeið og býður fram hæfnispróf veiðimanna.
Námskeiðið er dagsnámskeið, tekur um sex klukkustundir og fara fyrirlestrar fram á Teams. Það er að jafnaði kennt síðdegis.
Efnisflokkar:
Bókin Veiðar á villtum fuglum og spendýrum eftir Einar Guðmann. Bókin er ekki innifalin í námskeiðsgjaldinu. Hún fæst í bókabúðum.
Eftir að nemendur hafa hlýtt á fyrirlestra á Teams taka þeir stafrænt krossapróf.
Stafræna prófið er tekið á sal í Reykjavík eða á fræðslumiðstöð á landsbyggðinni. Nemandi velur sér próftökustað og próftökutíma í umsóknarferlinu.
Nemendur þurfa að hafa með sér fartölvu, spjaldtölvu eða snjallsíma til að þreyta prófið.
Þegar nemandi mætir í próf skal hann sanna á sér deili með skilríkjum og prófdómari opnar rafrænan aðgang að prófinu.
Þegar allir nemendur hafa komið sér fyrir opna þeir stafrænt próf í gegnum island.is með snjalltæki eða fartölvu og nota til þess rafræn skilríki.
Frá því prófið er opnað hefur nemandi 30 mínútur til að ljúka prófinu.
Fullnægjandi árangur á prófinu er 75% rétt svör.