Umhverfistofnun - Logo

Stök frétt

Umhverfisstofnun hefur gefið út skýrslu um niðurstöður mælinga á efnainnihaldi svifryks um áramótin 2018-2019. 

Sýnasöfnun fór fram á loftgæðamælistöðvunum við Grensásveg í Reykjavík og Dalsmára í Kópavogi á tímabilinu 27. desember 2018 – 10. janúar 2019 og gerðu Umhverfisstofnun og umhverfis- og auðlindaráðuneytið með sér samning um mælingarnar. Mæld voru sextán mismunandi gerðir fjölhringja kolefnissambanda (PAH 16) og sautján frumefni.

Veruleg aukning varð á hlutfalli ýmissa efna í svifrykinu um áramótin. Þau efni sem hækka langmest eru efni sem mætti kalla einkennisefni fyrir mengun frá flugeldum. Því er ljóst að þessi efni eru ekki að koma frá öðrum uppsprettum eins og t.d. áramótabrennum.

Ryk með þessa efnasamsetningu verður að teljast varasamt. Það mælist afar hátt um áramótin, stór hluti þess er mjög fínn, það er málmríkt, kolefnisríkt, brennisteinsríkt og í því mælast efni eins og bensó(a)pýren í hlutfallslega háum styrk. Fyrir brennistein er t.d. mengunarálagið um áramót gróflega jafngildi eins mánaðar hefðbundins mengunarálags.

Umhverfisstofnun hvetur alla til hófsemi í notkun flugelda og undirstrikar að mengun frá flugeldum er raunverulegt vandamál hér á landi. Þar er svifrykið það sem veldur mestum heilsufarsáhrifum. Stofnunin bendir á að loftmengun hefur neikvæð áhrif á þá sem fyrir henni verða, sérstaklega viðkvæma hópa eins og börn, aldraða og fólk sem er veikt fyrir. Svifryk veldur ekki einungis óþægindum heldur skerðir lífsgæði margra. 

Flugeldar eru aldrei umhverfisvænir eða skaðlausir og því er mikilvægt að minnka verulega magn flugelda sem skotið er upp um áramót þar sem þeim fylgir ávalt mikið svifryk.

Skýrsluna í heild má sjá hér