Umhverfisstofnun heldur þann 26. janúar n.k. kynningarfund um plöntuverndarvörur fyrir þá sem koma að markaðssetningu og notkun þeirra hér á landi. Plöntuverndarvörur eru illgresiseyðar, sveppaeyðar, skordýraeyðar og stýriefni sem notaðar eru gegn skaðvöldum í landbúnaði og garðyrkju.

Tilefnið er að miklar breytingar hafa orðið á löggjöf um efni og efnablöndur á undanförnum árum í kjölfar gildistöku efnalaga árið 2013 og settar hafa verið nýjar reglugerðir um plöntuverndarvörur, um meðferð varnarefna, um flokkun og merkingu efna og efnablandna og um öryggisblöð.

Á fundinum verður fjallað um helstu þætti þessarar löggjafar og jafnframt fjallað um aðgerðaáætlun um notkun varnarefna sem umhverfis- og auðlindaráðherra gaf nýverið út.

Vakin er athygli á því að fundurinn uppfyllir kröfur reglugerðar nr. 980/2015 um viðeigandi endurmenntun fyrir þá einstaklinga sem hyggjast endurnýja notendaleyfi fyrir plöntuverndarvörum.

Fundurinn verður haldinn þann 26. janúar 2017, kl. 14-16, í húsakynnum Umhverfisstofnunar að Suðurlandsbraut 24 á 5. hæð. Boðið verður upp á að taka þátt í fundinum í gegnum fjarfundarbúnað. Þeir sem hyggjast nýta sér fundinn sem endurmenntun og taka þátt í gegnum fjarfundarbúnað verða beðnir um að taka virkan þátt á meðan fundinum stendur.

Dagskrá:

1. Efnalög nr. 61/2013, ákvæði sem snúa að plöntuverndarvörum

   Björn Gunnlaugsson, teymisstjóri

2. Markaðsleyfi fyrir plöntuverndarvörum

   Björn Gunnlaugsson, teymisstjóri

3. Notendaleyfi og meðferð varnarefna

   Helga Ösp Jónsdóttir, sérfræðingur

4. Kaffihlé
5. Þvingunarúrræði og viðurlög

   Maríanna Said, lögfræðingur

6. Aðgerðaráætlun um notkun varnarefna

   Björn Gunnlaugsson, teymisstjóri

7. Umræður

Vinsamlegast tilkynnið þátttöku með því að senda tölvupóst á ust@ust.is fyrir lok dags 24. janúar 2017. Látið koma fram hvort viðkomandi hyggist sitja fundinn sjálfan eða taka þátt í gegnum fjarfundarbúnað.

Nánari upplýsingar veitir Björn Gunnlaugsson, sími 591-2000.